غزل
نور خو بس انکار کومه ستړی شوم
څو به انتظار کومه ستړی شوم
خدايه د هر چا سترګو کې اوښکې دي
غم به د کوم يار کومه ستړی شوم
هر څوک د دوستۍ په نوم دوکه کوي
څو به اعتبار کومه ستړی شوم
نوم به د يو ښکلي په خوله وانخلم
ژوند په سره انګار کومه ستړی شوم
هيڅ په منتونو مې پخلا نه کړ
نور ورته ازار کومه ستړی شوم
نه راځي د زړه ټکور مې نه راځي
هسې د شپو شمار کومه ستړی شوم
لارې ېې نصرته نورې نه څارم
ځمه ترې خپل کار کومه ستړی شوم
No comments:
Post a Comment